1Jo 4 | NAS | STEP | Ee aing mmaikoriꞌ piaarampimaing, ookara tanuaananka naroꞌketa masikaꞌantaverereriaꞌ otoai, teka ioꞌ nantoong karantavaariko~ paaraverererimaatoai teing tanuaananka tasiꞌkoo teing Kumponing-etaning deekoꞌ, aiꞌ aung-koo kansiꞌkoo tee mmauꞌ oreng tanuaananka otorong nakaro-nupoong~ karantavurimaing, eeꞌnoko teing nakaro-nupoong tosiarima Kumponing-etaining tamparimaung.

1 John 4

Tanuaang Kumponing-etaing Eeꞌnoko Tanuaananka Oreng Simpeꞌarampiainaꞌ

1 Ee aing mmaikoriꞌ piaarampimaing, ookara tanuaananka naroꞌketa masikaꞌantaverereriaꞌ otoai, teka ioꞌ nantoong karantavaariko~ paaraverererimaatoai teing tanuaananka tasiꞌkoo teing Kumponing-etaning deekoꞌ, aiꞌ aung-koo kansiꞌkoo tee mmauꞌ oreng tanuaananka otorong nakaro-nupoong~ karantavurimaing, eeꞌnoko teing nakaro-nupoong tosiarima Kumponing-etaining tamparimaung. 2 Tee eeꞌpinaꞌ tasiꞌperiaing tee tanuaang kara okoraꞌ Kumponing bakaang deekoꞌ: ookara tanuaananka Kumponing-etaining teing tanaꞌeriko arooꞌaara siraꞌpariri aaꞌpaavaining, “Eeꞌ, tee Jiisuuꞌ, tee Kumponinge teroita Pakoꞌpariꞌniiꞌ nantoong domampurira tarevuriainooꞌ koo masikaꞌ pouꞌnung koontoꞌ naning-naumpui.” 3 Teka ookara tanuaananka Jiisuuꞌkoo teeꞌ minku-koo makosi deeaing teing Kumponing-etaning deeaꞌ. Teing tee Karistooꞌkoo karenung pankaing bakaning, tee eeꞌnara tero diiꞌke poaing taaraveruꞌnung, eeꞌnoko tee bakaang tanuaang tee enang anke kansiꞌkoo tero pora otong. 4 Ee aing mmaikoriꞌ, toirekaaꞌ, diiꞌ teing Kumponing bakaning eeꞌnoko diiꞌke tee teing nakaro-nupoong tositosinanka boong deempereruꞌ, aiꞌ tee Kumponing diiꞌkoo otoing tee aaꞌnaꞌ purintoꞌ tee-koo teing kansiꞌnupoong-koo otomaung-koo. 5 Teing nakaro-nupoong tositosinanka teing kansiꞌkoo-nupoong, teeꞌkoo kapooꞌ teinge minkuaamaing teing kansiꞌaapening eeꞌnoko ookarai kansiꞌkoo-nupoonge teing taaravaarima siompaarimaung. 6 Niiꞌ teing Kumponing bakaning. Baa tee naning Kumponing noruꞌui otomaung teie tee niiꞌ taaramurimaung eeꞌnoko teie naninge Kumponing bakaang deeaunge tee niiꞌ taaramuriaung, eeꞌnoko teeꞌkoo niiꞌke tasiꞌpampimaung tee Tanuaang kara masikung minkuvumaung eeꞌnoko tee tanuaang tosi minkuvumaung.

Kumponing Piaavampima Tee Niiꞌke Naning Niiꞌmaikoꞌ Naroꞌka Piaavampiaing

7 Ee mmaikoriꞌ piaarampimaing, narunaꞌ narunaꞌ piaameeri oꞌnorimaatoai, aiꞌ tee aarumo piaa-koong tee Kumponing-etaing, eeꞌnoko tee naning piaa bauko tee Kumponing-koo nerakaꞌpari pontoꞌaruꞌnung, eeꞌnoko teie Kumponing noruꞌui otong. 8 Teie naninge piaa noruꞌuaunge tee Kumponing noruꞌuaꞌ, aiꞌ Kumponing tee piaa okonara. 9 Kumponinge tee bakaang piaa niiꞌkoo eeꞌpinaꞌ nau-antamuruꞌ: Teie tee Bauring narung masikung kirokai botovuuꞌ aꞌ niiꞌanko kansiꞌkoo niiꞌ tee-koo domamariiꞌnaang. 10 Teeꞌkoo eeꞌnaꞌkoo piaa masikung niiꞌke oo-koo makosi, niiꞌke Kumponing piaavampiruꞌnung-koo deeaꞌ, teka teie niiꞌ tutung piaamurira Bauring botovuuꞌnung-koo tee iira Kumponing-etaing niikaning orakaꞌ nkonanka-koo oꞌantamemuriiꞌnaang. 11 Ee mmaikoriꞌ, teeꞌ nariꞌ Kumponinge piaamuruꞌnung deemparako niiꞌ teeꞌke narunaꞌ narunaꞌ piaameeriainge. 12 Naninge tee Kumponing niiꞌnaꞌmung oovuaꞌ; teka niiꞌ narunaꞌ narunaꞌ piaameerimaing deemarima niiꞌka tasiꞌmariai Kumponing tee niiꞌkoo otomaung eeꞌnoko bakaang piaa tee niiꞌkoo dupeari otong. 13 Aiꞌ teie tee bakaang Tanuaang Meekung niiꞌ tankaang-antamurioꞌ niiꞌke tasiꞌpampimaung niiꞌ tee ninka nariꞌ oꞌnorimaung eeꞌnoko tee niiꞌkoo otokooꞌ. 14 Eeꞌnoko niiꞌke tee ooampiruꞌ eeꞌnoko siraꞌpampima daankiampima eeꞌ nauarampikooꞌ, “Baumai tee Bauring botovuuꞌ nantoong kansiꞌnupoong ootukuning mooꞌuriiꞌnaang.” 15 Baa tee naning Jiisuuꞌ siraꞌpui Kumponing Bauring tampumaung, Kumponing tee tee-koo kuung otomaung eeꞌnoko tee Kumponing-koo kuung otokooꞌ. 16 Teeꞌkoo niiꞌ bakaang piaa naumuriko niiꞌke tasiꞌpampima arooꞌampimaung, aiꞌ Kumponing tee piaa okoraꞌ, eeꞌnoko baa tee piaa-koo otomaung tee teeꞌ nariꞌ Kumponing-koo otomaung eeꞌnoko Kumponing tee-koo otokooꞌ.

Kumponing Bakaang Piaa Tee Iriꞌpoꞌnung Avoroꞌnaanka-koo Muntemunteꞌ

17 Kumponing bakaang piaa tee niiꞌkoo dupearamaung niiꞌ maiaꞌmoriaꞌ eeꞌnoko papaaramariaꞌ oꞌnoriaꞌnaang teꞌmung tuutunan-naꞌmung tee-koo uroꞌkanooꞌke donkonampira, Karistooꞌpinaꞌ oroꞌmariritaaꞌ anke kansiꞌkoo oꞌnoruꞌnung-koo. 18 Piaa-koo tee avoroꞌ otoaꞌ, teka teie piaae dupe-antaniiꞌke tee avoroꞌ bataꞌumaung. Aiꞌ avoroꞌ tee nantoonge kiimata noruꞌai avoreaamaung. Eeꞌnoko baa-koo tee-koo avoromaung-koo piaa tee dupe-antaniiꞌ otoaꞌ. 19 Niiꞌke tee Kumponing piaavampimaung niiꞌ tutung teie piaamuruꞌnung-koo. 20 Naning narunge aaꞌpupeuꞌ, “Ninge tee Kumponing piaavansi oꞌnong,” teka baꞌmaikoꞌ munteꞌuma tee tee tosi bauko. Baa tee naning tee baꞌmaikoꞌ oovui nariꞌ otoremaung piaavuaung teie tee Kumponing piaavuarupeuꞌ tee teie dutai oovuaung. 21 Eeꞌnoko aung tee boto niiꞌ teie amuruꞌnung, “Baie tee Kumponing piaavuainge tee baꞌmaikoꞌ teeꞌ nariꞌ piaavuainge.”